唱：(我身騎白馬噢~~~過三關，爲著寶川仔~~~回中原~~~) 台灣本土的歌仔戲，陪伴著台灣的婦女朋友、阿公阿嬤，度過人生的歲月，歌仔戲乎人愛聽、愛看，小生小旦、忠臣奸臣的各種角色，乎成千數萬的大姐小妹癡迷！可是你甘知影？歌仔戲的由來，正是來自咱宜蘭員山鄉、結頭份、茄苳大樹公的大樹腳！ 西元1870年，142冬前，宜蘭員山庄，結頭份堡，出細一個囝仔，姓歐叫來助仔，歐來助真有音樂戲曲的天份，大漢了後，時常在結頭份庄的茄苳樹腳，A弦仔唱歌。
當時所唱：每句七字、每節四句；七字仔、四句聯仔，押韻的歌調。唱出著日常生活當中，做田做食人的心聲，當時叫做：大樹腳唱歌仔！ 後來真濟人學，形成廟會祭典的一項陣頭，叫做：「落地掃」。
再加入著弄車鼓、採茶戲、平劇、亂彈、福州戲，包括音樂、服裝、身段、道具，演變成今仔日的「歌仔戲」！追溯尚早來源，正是來自咱員山結頭份大樹腳，歐來助的歌仔。 楊麗花歌仔戲，迷倒普羅眾生，家庭婦女，飯袜記煮，歌仔戲一定準時愛看；今年3月結頭份社區理事長-----陳聰文，特別爭取預算，就在永同路二段的路燈頂關(高)，掛上「大樹公」的標誌，加上綠底紅色「結頭份」三字，要乎人客來到咱，員山結頭份，就知影進入著：台灣歌仔戲的原鄉！ 噶瑪蘭、呿呿硐 員山結頭份-----歌仔戲的原鄉